A proposet, Lustrissem, de vaccina,
ch’el senta s’el voeur rid questa che chì,
ch’el sarà on mes che la m’è occorsa a mì
in del fa vaccinà la Barborina.Gh’eva in cà del dottor ona mammina
che l’eva in d’on fastidi de no dì
per sciarnì foeura el sit de fà insedì
i varoeul a ona sova piscinina.Minga chi, perchè chi el dà trop in l’oeucc,
minga là, perchè là se vedarà,
chi nanch, perchè ghe resta el segn di boeucc.Tira, bestira, on mondo de rason,
fin ch’el medegh, per falla quiettà,
Femmegh l’inset, el dis, in suj garon?Oh che tocch de mincion,
(l’esclama sta sciorina all’improvvista)
suj garon? Giust inscì, pussee anmò in vista!
C. Porta, Poesie, 1821